උණුසුම් පුවත්
Search
tomato fever

අලුත්ම අත්-පා-මුඛ වෛරසයක් ඉන්දියාවෙන්

44

ඉන්දියාවේ පැතිරෙන නව වයිරස උණ රෝගයක් ගැන එරට වෛද්‍යවරු බිය පළ කරති.

‘තක්කාලි උණ’ (ටොමැටෝ ෆීවර්) යන නමින් හැඳින්වෙන මෙම රෝගය නව මාදිලියේ අත්, පා, මුඛ වයිරසයක් ලෙස ඉන්දීය වෛද්‍ය පර්යේෂකයන් හඳුනා ගෙන තිබේ.

මේ වන විට කේරළ, ඔඩීෂා සහ තමිල්නාඩු ප්‍රාන්තවලින් රෝගී වූ දරුවන් 200 කට වඩා වාර්තා වී ඇති බව පැවැසෙයි.

වයිරසය ආසාදිතයන්ගේ සිරුරේ රතු පැහැති වේදනාකාරී බිබිලි මතු වී ක්‍රමයෙන් කුඩා තක්කාලි ගෙඩියක ප්‍රමාණයට ඒවා විශාල වීම හේතුවෙන් ඉන්දියානුවන් මෙම උණ රෝගය ‘තක්කාලි උණ’ ලෙස හඳුන්වන බව පැවැසෙයි.

සාමාන්‍ය අත්, පා, මුඛ රෝගයේදී මෙන්ම මෙම නව රෝගයේ ද රෝග ලක්ෂණ වන්නේ අධික උණ, උගුරේ ආසාදන, ඇඟපත කැක්කුම, සන්ධි ඉදිමීම, තෙහෙට්ටුවය. ඊට අමතරව, කුඩා දරුවන් අතරේ ඔක්කාරය, වමනය සහ පාචනය ද දැකිය හැකිය.

අත්, පා, මුඛ රෝගය එන්ටරෝ වයිරස් නමැති වයිරස පවුලේ සාමාජිකයකු වන අතර අවුරුදු 9 ට අඩු කුඩා දරුවන්ට ආසාදනය වන උණ රෝගී තත්ත්වයකි.

ඉන්දියාවේ පැතිරෙන ‘තක්කාලි උණ’ එන්ටරෝ වයිරස් පවුලට එක්වන නවතම සාමාජිකයා යැයි වෛද්‍යවරු පෙන්වා දෙති.

අත්, පා, මුඛ රෝගයට හෝ එහි නව මාදිලිය ලෙස හඳුනා ගත් මෙම ‘තක්කාලි උණ’ සඳහා ද කිසිදු ඖෂධයක් නැත.

රෝගය සමඟ බැක්ටීරියා ආසාදන තත්ත්වයක් පෙන්නුම් කරන්නේ නම් ඊට අවශ්‍ය ප්‍රතිකාර ලබා දීම සිදු කෙරේ.

‘තක්කාලි උණ’ පළමුවෙන් ව්‍යාප්ත වීමට පටන්ගෙන ඇත්තේ කේරළ ප්‍රාන්තයේ කොල්ලාම් නුවර අයත් කොල්ලාම් දිස්ත්‍රික්කයෙනි. ඒ පසුගිය මැයි 6 වැනිදාය.
අද වන විට කේරළයේ අන්චල්, ආර්යන්කාවු සහ නෙදුවතූර් යන දිස්ත්‍රික්ක වලට ද වයිරසය ව්‍යාප්ත වී ඇත.

කොල්ලාම් දිස්ත්‍රික්කයෙන් පමණක් ‘තක්කාලි උණ’ රෝගී දරුවන් 82 ක් හමුවී ඇත. ඒ සියලු දෙනා අවුරුදු 5 ට අඩු දරුවන්ය.

කේරළ ප්‍රාන්තයෙන් ආරම්භ වූ ජූනි සහ ජූලි මාස වනවිට ‘තක්කාලි උණ’ අසල්වැසි තමිල්නාඩුවටත්, ඔඩීෂා ප්‍රාන්තයටත් ව්‍යාප්ත වී ඇතැයි සෞඛ්‍ය බලධාරීහු පැහැදිලි කරති.

ඔඩීෂා ප්‍රාන්තයේ ‘තක්කාලි උණ’ ආසාදනය වී ඇත්තේ අවුරුදු 1 ත් 9 ත් දරුවන්ටය. දරුවන් 26 දෙනකුට වයිරසය ආසාදනය වී ඇතැයි බුබනේෂ්වෝර් ප්‍රදේශීය වෛද්‍ය පර්යේෂණ මධ්‍යස්ථානය නිකුත් කළ නිවේදනයක සඳහන් වෙයි.

(එන්.ඩී.ටීවී.)




Leave a Reply

Your email address will not be published.