උණුසුම් පුවත්
Search
monkeypox

ලොව පුරා මන්කිපොක්ස් ආසාදිතයින් 18,000 ඉක්මවයි

53

ලොව සමස්ත වඳුරු උණ ආසාදිතයන් ගණන මේ වනවිට 18,000 පසු කර ඇතැයි ලෝක සෞඛ්‍ය සංවිධානය පවසයි.

වැඩිම ආසාදිතයන් වාර්තා වන්නේ යුරෝපා රටවලින් බව ද ලෝක සෞඛ්‍ය සංවිධානය පෙන්වා දෙයි.

ලෝක සෞඛ්‍ය සංවිධානයට අනුව, රටවල් 78කට මේ වනවිට වඳුරු උණ වයිරසය ව්‍යාප්ත වී තිබේ.

ගෝලීය හදිසි තත්ත්වයක් ඇති කළ ‘වඳුරු උණ’ (මන්කිපොක්ස්) වසංගතය පාලනය කළ හැකි යැයි ද ලෝක සෞඛ්‍ය සංවිධානයේ ප්‍රධානී ටෙඩ්‍රෝස් ඇඩ්හොම් ගෙබ්‍රියේසිස් පැහැදිලි කර තිබේ.

ලෝක සෞඛ්‍ය සංවිධානයේ ප්‍රධානියා මෙසේ පැහැදිලි කළේ, ‘වඳුරු උණ’ ව්‍යාප්තිය සම්බන්ධයෙන් විශේෂ මාධ්‍ය හමුවක් කැඳවමිනි.

‘ලෝක සෞඛ්‍ය සංවිධානය විශ්වාස කරන අන්දමට, ආසාදිතයන් හඳුනා ගැනීම සහ නිරෝධායනය හරහා වඳුරු උණ වයිරස වසංගතය පාලනය කරගන්න පුළුවන්. එසේ කරන්න නම් ලොව අප සැවොම එකමුතුව කටයුතු කළ යුතුයි’ යැයි එම මාධ්‍ය හමුවේ දී ගෙබ්‍රියේසිස් පැවැසීය.

මේ අතර, ලෝක සෞඛ්‍ය සංවිධානයේ ප්‍රධාන විද්‍යාඥ, ඉන්දීය සම්භවයක් ඇති සෞම්‍යා ස්වාමිනාදන් පෙන්වා දෙන්නේ ‘වඳුරු උණ’ ගෝලීය වසංගත තත්ත්වයක් තෙක් දුරදිග යෑම අප කාගේත් විශේෂ අවධානයට ලක් විය යුතු බවය.

‘වඳුරු උණ කියන්නේ පැපොල සහ මාරක වසූරිය වයිරස රෝගවල අතර මැද තත්ත්වයක්. 1979 සහ 1980 වසරවලින් පසු අප වසූරියට එරෙහිව එන්නත් වැඩසටහන් නවතා දැම්මා. වඳුරු උණ වයිරසය වැඩි දියුණු වී ගෝලීය වසංගත තත්ත්වයක් බවට පත් වීමට එය හේතුවක් වුණා වෙන්න පුළුවන්’ යැයි සෞම්‍යා ස්වාමිනාදන් පැහැදිලි කර තිබේ.

Source – NDTV




Leave a Reply

Your email address will not be published.