උණුසුම් පුවත්
Search
menaka peris

”මම දුක්වෙන, පසුතැවෙන කෙනෙක් නෙමෙයි” – වසර 07කට පසු සිනමාවෙන් දකින මේනකා පීරිස්

232

ඇය සිටියේ දිගු නිහැඬියාවකිනි. පසුගිය 22 වැනිදා සිට ඇය නිහැඬියාව බිඳින්න සැරසුණාය. ඒ සුමිත්‍රා රාහුබද්ධගේ කතාව සහ තිර රචනයකට අනුව අසෝක අතාවුදහෙට්ටිගේ අධ්‍යක්ෂණයෙන් රේණුකා බාලසූරිය සහ සුනිල් ටී. ප්‍රනාන්දුගේ නිෂ්පාදනයෙන් රිදී තිරයට ගොඩවුණු ‘මින්නු’ හරහාය. ඇය නමින් මේනකා පීරිස්ය. ඒ අනුව සතිඅන්ත පුවත්පතකට සම්මුඛ වූ ඇය…

මේනකා පීරිස්ව කොච්චර කාලෙකට පස්සේද රිදී තිරයෙන් දකින්න හම්බවෙන්නේ ?

රිදී තිරයෙන් දකින්න හම්බවෙන්නේ මගේ මතකයේ හැටියට අවුරුදු 07කට විතර පසුවයි.

May be an image of 1 person and jewelry

‘මින්නු’ සිනමා නිර්මාණය ගැන මොකද හිතෙන්නේ?

‘මින්නු’ කියන්නේ වෙනස්ම කතා තේමාවකින් නිර්මාණය වුණු චිත්‍රපටයක්’ මනුස්සයෙකුට ජීවත්වෙන්න ආදරය කොයිතරම් දුරට වැදගත්ද කියන කාරණාව ‘මින්නු’ සිනමා නිර්මාණය හරහා මුළු සමස්ත සමාජයටම දැනේවි කියලා මට හිතෙනවා. ආදරයේ විවිධ ස්ථරයන් ගැන කතා කරන පවුලේ චිත්‍රපටයක්.

‘මින්නු’ට ආරාධනා ලැබුණේ කොහොමද?

ක්ෂේත්‍රයට ඇවිත් අවුරුදු හතරක වගේ කෙටි කාලයක් තුළදී තමයි මේ සඳහා ආරාධනාව ලැබෙන්නේ. එතකොට මගේ වයස අවුරුදු විසිදෙකක් විතර ඇති.

අසෝක අතාවුදහෙට්ටි අධ්‍යක්ෂවරයා ගැන මොකද හිතෙන්නේ?

ටිකක් වෙනස් විදිහේ චරිතයක්. මට මුලින්ම ඔහු චරිතයේ විවිධ ස්වභාවයන් රඟපාලා පෙන්වන්න කිව්වා. ඒ අවස්ථාවේ මාව මේ චරිතයට තෝරාගත්තා කියලා කිව්වේ නැහැ. ඊට පසුව තමයි මාව තෝරාගෙන තිබෙනවා කියලා කිව්වේ. මේක සුමිත්‍රා රාහුබද්ධගේ තිරපිටපතක් සහ රේණුකා බාලසූරිය වගේම සුනිල් ටී. ප්‍රනාන්දු මහතාගේ නිෂ්පාදනයක්.

May be an image of 1 person and jewelry

‘මින්නු’ කියන්නේ සෑහෙන කාලෙකට කලින් කරපු වැඩක්?

මේක අවුරුදු එකොළහකට කලින් කරපු වැඩක්’ මගේ මතකයේ හැටියට මෙහි රූපගත කිරීම් සිදුකළේ 2013 වසරේ අගෝස්තුවේ දී.

ඇත්තටම මේ දවස්වල මොකද කරන්නේ?

මේ දවස්වල සෙකියුරිටි. මොකද පුතාව පෙර පාසල් අධ්‍යාපනයට යොමු කළා. එයාට මම නැතිව ඉන්න බැහැ. ඉතිං පෙර පාසලට ගිය ගමන් ඇඬුවා…. අම්මා කෙනකු විදිහට මටත් ඒක දරාගන්න බැරි වුණා. ඒක හින්දා ඇත්තටම මේ දවස්වල ඩියුටි එක මොන්ටිසෝරි එකේ ගේට් එක මුරකරන එක තමයි…..

දැන් රඟපෑමට ආරාධනා නැතිද?

නිර්මාණ කිහිපයකටම කතා කළා. මම අවුරුදු 03කින් රංගන ජීවිතයේ කිසිම වැඩ කටයුත්තක් කළේ නැහැ. මම හරි ආසාවෙන් ඉන්නවා වෙනස්ම විදිහේ කර්කෂ චරිතයකින් ප්‍රේක්ෂකයා අතරට යන්න…. හොඳ තිරපිටපතක් ලැබෙනකම් තමයි බලාගෙන ඉන්නේ.

මේනකා පීරිස් රඟපෑමට සමුදීලා නැහැ?

නැහැ. නැහැ. සමුදීලා නැහැ…. කලාවෙන් කෙටි කාලයක් සමුගත්තේ පොඩි විවේකයකට. ඇත්තටම පුතා නිසයි ඒ කෙටි කාලයත් විවේකය ගත්තේ. දරුවා කුසට ආපු දවසේ ඉඳලා ඒක මම වින්දා. මගේ දරුවා කුසේ ඉඳලා පළමුවෙන්ම මට ප්‍රතිචාර දක්වපු දවස වගේම වෙලාවත් මට අද වගේ මතකයි. ඇත්තටම මට ඒ ගැන කියන්න වචන නැහැ. ඉතිං ඒ හින්දයි මම කලාවට පොඩි විවේකයක් දුන්නේ. මොකද ඔහුගේ ළමා කාලය ආපහු දකින්න බැහැනේ. මෙයා එන්න එන්නම ලොකු වෙනවා. ඉතිං ඒ කාලය මට අහිමිවේවි කියලා හිතලාමයි ඒ විවේකය ලබාගත්තේ….

May be an image of 1 person

ඔබ රඟපාන්න කැමැති චරිත තිබෙනවාද?

වෙනස්ම විදිහේ කර්කෂ චරිතයක් රඟපාන්න කැමැතියි. ඇත්තටම සමහරක් චරිත තියෙන්නේ හරිම දුක් විඳින්න ඕනෑ චරිත. රඟපෑමටත් ඒ දුක විඳින්න ඕනෑ…. මම ආසයි හැම තිස්සේම කරන්න අපහසු විදිහේ චරිත කරන්න. මොකද මට හම්බවුණේම ඒ වගේ චරිත. මට ලැබුණු ගොඩක් චරිත හරි බරයි. ඉතිං මම අදටත් ආසා එවැනි චරිත කරන්න…..

මේනකාගේ නර්තන හැකියාවට මොකද වුණේ?

අවුරුදු තුනකට විරාමයක් දුන්නා. පුතාට අවුරුදු එකහමාරක් වුණාට පස්සේ තමයි මගේ නර්තන පන්තිය මගේ ගෙදර පටන් ගත්තේ. පොඩි වෙනසකටත් එක්ක තමයි ඒක ආරම්භ කළේ. දැන්නම් පිළියන්දල ෆැබ් බිල්ඩින් එක ඉහළ මාලයේ තමයි නර්තන පන්තිය පවත්වාගෙන යන්නේ. දැන් විවිධ ප්‍රදේශ වලින් දුරකථන ඇමතුම් එනවා පන්ති පවත්වන්න කියලා. ඉස්සර නම් මගේ නර්තන පන්ති ශාඛා පහක් හයක් තිබුණා. ඒ සියල්ල මම නවතා දැමුවා. මොකද කොරෝනා වසංගතය හින්දා අපේ සියලුම දේවල් නවත්වන්න සිද්ධ වුණා. දැනට නම් එක පන්තියයි පවත්වාගෙන යන්නේ. මොකද පුතාව දැන් මාස දෙකක් තිස්සේ තමයි ගෙදර තියලා යන්නේ…. නැතිනම් මම ඔහුවත් නැටුම් පන්තියට අරගෙන ගියා.

May be an image of 1 person and jewelry

සැමියාගෙන් ලැබෙන සහයෝගය?

ඔහු මට රංගනයට කිසිම දේකට නීති රීති දාන කෙනෙක් නෙමෙයි. නමුත් ඔහු නිතරම කියන්නේ විශිෂ්ට රංගනයන් සමගින් ප්‍රේක්ෂකයන් අතරට යන්න කියලයි. ඔහු හරි සරලයි. සාමකාමී චරිතයක්. ලොකු ලොකු දේවල් ඔහුගේ හිතේ නැහැ….. ඔහුටත් අවශ්‍ය සතුටින් ජීවිතය ගත කරන්න. ඇත්තටම කිව්වොත් හරි සරලයි. කිසිම විදිහට නීතියක් මට දාලා නැහැ.

ඔබේ රංගන ජීවිතය ගැන ආපසු හැරී බැලුවොත් ?

රංගන ජීවිතය හින්දා මම සෑහෙන තෘප්තියක් ලැබුවා. ප්‍රේක්ෂකයන් අතරට යම් යම් පණිවුඩයක් දෙන්න පුළුවන් චරිත මම රඟපෑවා කියලා මම හිතනවා. මාව විශ්වාස කරලා හොඳ චරිත මට අධ්‍යක්ෂවරු මට ලබාදුන්නා. ඇත්තටම ආපස්සට හැරිලා බලද්දී මට කියන්න මම රඟපෑ ලස්සන චරිත තියෙනවා. හැබැයි මම ලොකු නාට්‍ය කරපු කෙනකුත් නෙමෙයි. ඒ හැම චරිතයක්ම අතිශය ගැඹුරු සමාජයට පණිඩුයක් දෙන රංගන ශීල්පිණීයක් විදිහට මාර කැපකිරීම් කරන්න තිබුණ චරිත.

May be an image of 1 person

ජීවිතය ගැන ආපසු හැරී බැලුවොත්?

මම තේරුම් ගත්තේ එක දෙයයි. අපේ ජීවිතයේ හැම දෙයක්ම හැම මොහොතකම සිදුවෙන්නේ අපේ හොඳටයි. මම තේරුම් ගත්තේ එකම දේ ඒකයි….. මගේ ජීවිතයේ ආපසු හැරී බැලුවොත් මට වෙලා තියෙන හැමදේම හොඳට සිද්ධවුණ දේවල්. මම දුක්වෙන පසුතැවෙන කෙනෙක් නෙමෙයි…. මම හැම තිස්සේම උත්සාහ කරන්නේ ජීවිතයේ ඉදිරියට යන්න. මට හරි සතුටුයි මගේ ජීවිතය ගැන. මට ලැබිලා තියෙන මේ ලෝකේ හරි උතුම්ම සම්පත වන මව් පදවිය. ඊළඟට මගේ දරුවා. ඔහුගේ මුහුණ දකිද්දි මම තමයි මේ ලෝකේ ඉන්න වාසනාවන්තම අම්මා කියලා මට හිතෙනවා. මේ ලෝකයේ ජීවත්වන බොහෝ අම්මලාටත් එහෙම හිතෙනවා ඇති.

May be an image of 1 person

දිනේෂ් විතාන

Source – Meewitha