උණුසුම් පුවත්
Search

දුමින්දට ලැබුණු අධිකරණ නියෝගයෙන් පසු හිරුණිකාගේ මව හඬ අවදි කරයි – ඇගෙන් ජනපතිටත් අභියෝගයක්

2811

හිටපු පාර්ලිමේන්තු මන්ත්‍රී දුමින්ද සිල්වාට ජනාධිපති සමාව ලබාදුන් හේතුව තමාට ජනාධිපතිවරයාගෙන් පෞද්ගලිකවම දැනගත යුතු බව පාර්ලිමේන්තු මන්ත්‍රීනී හිරුණිකා ප්‍රේමචන්ද්‍රගේ මව පවසනවා.

විශේෂ මාධ්‍ය හමුවකට එක්වෙමින් ඇය අද (04) මේ බව සඳහන් කර සිටියා.

එහි දී ඇය වැඩිදුරටත් අදහස් දක්වමින් චෝදනා කළේ ජනධිපතිවරයා සිය ධුරයට පත්වීමෙන් පසු සිදු කළේ සිය ගජමිතුරන්ට බදු සහන ලබාදීම සහ ජනාධිපති සමාව ලබාදීම පමණක් බවයි.

ජනධිපති සමාව අපේක්ෂාවෙන් විශාල සිරකරුවන් පිරිසක් සිටින අතරවාරයේ දුමින්ද සිල්වාට පමණක් මෙලෙස ජනධිපති සමාව ලබාදුන්නේ කෙසේදැයි ඇය මෙහිදී ප්‍රශ්න කර සිටියා.

දුමින්ද සිල්වා යළි රක්ෂිත බන්ධනාගාර ගත කරන ලෙසට අධිකරණ නියෝගය ලැබීමෙන් පසු ඔහුට වලිප්පුව රෝගය වැළඳී රෝහල් ගතව ප්‍රතිකාර ලබන බව සඳහන් කළ හිරුණිකා ප්‍රේමචන්ද්‍රගේ මව, ඔහුට මෙවැනි රෝගයක් මීට පෙර තිබුනේ ද නැත්නම් අධිකරණ නියෝගයත් සමඟ මෙය හටගත්තේ ද යන්න සම්බන්ධයෙන් තමන්ට ගැටළුවක් ඇති බවයි මෙහිදී කියා සිටියේ.

මේ අතර ඇය මෙම මාධ්‍ය හමුවේදී වැඩිදුරටත් සඳහන් කළේ මෙවැනි බොරුකාරයින්ට ප්‍රතිකාර කර වෛද්‍ය වෘත්තියේ ඇති ගරුත්වය කෙලසීමකට ලක් නොකරන ලෙසටයි.

එමෙන්ම සිය සැමියාට වෙඩි තබන අවස්ථාවේ දී එම සිදුවීමට ඉඩ දී බලාගෙන සිටි බව කියන ඉහළ පොලිස් නිලධාරියා ගෝඨාගෝගමට පහරදීමට ඉඩ දී බලා සිටි බවත් ඇය මෙම මාධ්‍ය හමුවේදී සඳහන් කර සිටියා.

එමෙන්ම ගම සමඟ පිළිසදරකට ගෝඨා ගෝ ගමට පැමිණෙන ලෙස තමන් ජනාධිපතිවරයාට ආරාධනා කරන බව ඇය මෙම මාධ්‍ය හමුවදී පවසා සිටියා.

එහිදී වැඩිදුරටත් අදහස් දැක්වූ පාර්ලිමේන්තු මන්ත්‍රීනී හිරුණිකා ප්‍රේමචන්ද්‍රගේ මව පවසා සිටියේ දුමින්ද සිල්වා යළි රක්ෂිත බන්ධනාගාර ගත කරන ලෙසට ලබාදුන් තීන්දුව පිළිබඳව තමන්ට විශේෂ සතුටක් නොමැති බවයි.




Leave a Reply

Your email address will not be published.