ප්‍රකට රංගන හා නර්තන ශිල්පිණියක වන ශිරෝෂි රොමේෂිකා පසුගිය දා සිදුවූ අනපේක්ෂිත අනතුරකින් තුවාල ලබා අසාධ්‍ යවී මේ වන විට රෝහල් ගතව ප්‍රතිකාර ලබන බව වාර්තා වනවා.
පසුගිය ඉරිදා (09) සවස ඇය පවුලේ අය සමග බෙන්තොට ප්‍රදේශයේ විවේකය ගත කරන්නට ගිය අවස්ථාවක ජෙට්ස්කි (Jetski) ධාවනයේ යෙදී ඇති අතර ඇය පැදවූ බෝට්ටුව එම අවස්ථාවේ ගමන් ගත් තවත් බෝට්ටුවක මුහුණට මුහුණ ගැටීමෙන් ඇය විසිව ගොස් ඇති බවත් අනතුරින් තුවාල ලද ඇය මුදවාගෙන ආසන්නයේ පිහිටි කළුතර, නාගොඩ රෝහලට ඇතුළත් කළ බවත් වාර්තා වේ.
ඉරිදා හවස සිට අද වනතුරුත් ඇය එම රෝහලේ දැඩි සත්කාර ඒකකයේ පසුවන බව වාර්තා වේ.
රෝහල් ප්‍රකාශකයෙකුගෙන් විමසීමේ දී දැනගන්නට ලැබුනේ අනතුර හේතුවෙන් ඇගේ වකුගඩු වෙත රුධිරය කාන්දු වී ඇති බවයි.
මේ හේතුවෙන් ඇය ප්‍රතිකාර සඳහා යොමු කර ඇති අතර ඇයව යථා තත්වයට ගන්නට වෙහෙස ගනිමින් සිටින බව ද දන්වා ඇත.
ඇගේ සැමියා වන ගායක අමල් පෙරේරාට ඇය පරීක්ෂාවට අවසර ඇතත් කිසිවෙකුට ඇයව බලන්නට තවම අවසර ලබා දී නොමැති බව ද සඳහන් වේ.
ශිරෝෂි රොමේෂිකා කලා ලොවට පිවිසෙන්නේ ”ඩාන්සින් ස්ටාර්” තරගාවලියේ නර්තන තරගකාරියක ලෙසයි.
එම තරගාවලියේ විනිශ්චය සභිකයෙකු ලෙස කටයුතු කළ ප්‍රකට ගායක අමල් පෙරේරා සමග ඇය පසුව පෙම් සබඳතාවක් අරඹන අතර පසුකාලීනව ඔවුන් යුග දිවියට පිවිසියේය.
ශිරෝෂි සහ අමල් මේ වනවිට සිඟිති දියණියකගේ මව්පියන් ද වන්නේය.
